Հայ հոգեւորականը ահաբեկչութեան զոհ
Երբ Թուրքիոյ քրիստոնեայ փոքրամասնութիւնները մէկտեղուելով Մարտին, Ասորեցւոց Տէյրուլ Զաֆարան վանքին մէջ կ՚աղօթեն Թուրքիոյ Զինեալ Ուժերու դէպի Սուրիա կատարած արշաւանքին յաջողութեան համար, անդին սահմանի հանդիպակած կողմէն կը լսուին մահուան դէպքեր։ 11 Նոյեմբեր երկուշաբթի օր սպաննուած է Քամըշլըի Հայ Կաթողիկէ համայնքի ժողովրդապետ եւ հոգեւոր հովիւ Տէր Յովսէփ քահանայ Պետոյեանը եւ հայրը՝ Յաննա Պետոյեան սպաննուեցան ահաբեկչական յարձակումի մը հետեւանքով։
Տէր Յովսէփ եւ հայրը կրակոցներու ենթարկուեցան Հասեքէ Տէր Զօր ճանապարհին վրայ, երբ անոնք կը փորձէին երթալ Տէր Զօրի համայնքին հովուապետական այցով։ Իրենց հետ կը ճամբորդէր նաեւ ասորի սարկաւագ Ֆաղի Սանօ, որ ծանրօրէն վիրաւորուած է եւ փոխադրուած Քամըշլըի հիւանդանոց։
Տէր հօր յուղարկաւորութիւնը կատարուեցաւ Քամըշլըի Սուրբ Յովսէփ Հայ Կաթողիկէ Առաջնորդանիստ Եկեղեցւոյ մէջ, եպիսկոպոսական փոխանորդ առաջնորդ Անդրանիկ ծայրագոյն վարդապետ Այվազեանի ձեռամբ։
Արարողութեան ներկայ գտնուեցան Հայ Առաքելական Եկեղեցւոյ կաթողիկոսական տեղապահը, միւս քոյր եկեղեցիներու հոգեւոր ներկայացուցիչներ, հայ համայնքի հաւատացեալներ եւ իսլամադաւան հասարակութեան անդամներ, ի նշան զօրակցութեան։
Այվազեան հայր սուրբ իր քարոզին մէջ վեր առաւ հանգուցեալ քահանային նուիրական ծառայութեան ոգին եւ շեշտեց թէ ան նահատակն է համայն քրիստոնէութեան եւ նաեւ Սուրիական հայրենիքին։ Ան աւելցուց թէ Սուրիոյ մէջ հայերը լի իրաւ մասնիկն են ընկերութեան ու երկրին եւ Հայր Յովսէփ նահատակուեցաւ, երբ կը կատարէր իր հովվի պարտականութիւնը։ «Ես մեծ վստահութիւան ունէի իր վրայ։ Եւ անոր մահը ինծի համար մեծ կորուստ է։ Մեր նահատակներուն արիւնը այս հողին մէջ պիտի պտղաբերէ ու գեղեցիկ ծիլեր պիտի պարգեւէ» ըսաւ Այվազգեան հայր սուրբը։
Ողբացեալ քահանան ունէր որդի մը եւ երկու դուստր։ Ցաւալի զուգադիպութեամբ ոճիրը գործուած է Շեդդադէ կոչուած վայրը, ուր տեղի ունեցած էր 1915-ի Հայկական ցեղասպանութեան վերջին զանգուածային կոտորածը։
Տէր Յովսէփ քահանայի ձեռնադրութիւնը կատարուած էր 2014-ին ձեռամբ Արհ. Տէր Ռաֆաէյլ Արք. Մինասեանի, Հայաստանի Արեւիկ համայնքի մէջ։
Ոճիրէն անմիջապէս ետք ՏԱԻՇ ահաբեկչական կազմակերպութիւնը յայտարարութիւնով ստանձնեց յարձակումը։
Փրանկիսկոս Պապը «Թուիթըր»եան պատգամով մը ցաւակցեցաւ յուղարկաւորութեան համար մէկտեղուած Հայ կաթողիկէ համայնքին եւ նահատակուած քահանայի ընտանեկան պարագաներուն ու համայն Սուրիոյ քրիստոնէութեան։
Հայաստանի Հանրապետութեան Արտ գործ նախարարութիւնն ալ յայտարարութիւնով մը պախարակեց ոճիրը։ Յայտարարութեան մէջ նշուեցաւ, թէ Սուրիոյ հիւսիս արեւելեան հատուածի դէմ արշաւանքը կը խրախուսէ ահաբեկչական կազմակերպութիւնները եւ անպաշտպան կը թողու ազգային եւ կրօնական փոքրամասնութիւնները եւ առհասարակ խաղաղ բնակչութիւնը։
