Կոմիտասը ապրիլ Պարոյր Սեւակով
Հազիւ շաբաթներ առաջ մեր մօտ կը տիրէր այն մտավախութիւնը, ըստ որու պոլսահայերս պիտի թերանանք Կոմիտաս վարդապետի ծննդեան 150 ամեակը պատշաճ ձեւով նշելու։
Կը պարզուի թէ լրջօրէն սխալած ենք նման մտատանջութեան մատնուելով։ Այժմ նոր մտահոգութիւն մը կը տիրէ. չըլլայ որ նախատեսուած միջոցառումներու թուականները խաչաձեւուին։ Նման պարագայի բաւական դժուար պիտի ըլլայ նախընտրութիւն ընել ամէն մէկը իրարմէ հետաքրքրական ծրագիրներու միջեւ։
Խմբագրատունէ ներս վայելելով Տատեան Վարժարանի հիմնարկութեան 175-ամեակի յիշատակման յանձնախումբի նախագահ օր. Հերմինէ Պենլիօղլուի եւ յանձնախումբի անդամներէն մեր սիրելի բարեկամ եւ բազմավաստակ դերասան Արամ Կոստանեանի այցելութիւնը, վերահասու եղանք անոնց ձեռնարկած գրական- երաժշտական հանդիսութեան, ձօնուած մեծն Կոմիտասի յոբելեանին։
Քանի կը լսէինք նախատեսուած միջոցառման բովանդակութիւնը եւ կարգ մը մանրամասնութիւնները, մեր մէջ ալ աւելի կը բարձրանար հրճուանքի զգացումը։ Արդարեւ տատեանցիներ որոշած են Կոմիտասը ոգեկոչել Պարոյր Սեւակի կոթողային գործէն՝ «Անլռելի Զանգակատուն»էն հատուածներով։ Այս բացառիկ բեմադրութեան մէջ Արամ Կոստանեանի կողքին բեմ պիտի ելլեն Լիտա Քէօսէօղլու, Արի Պարութօղլու, Արալ Ճան Տուվարճը, Ագսել Ճերանօղլու, Կարէն Արսլան, Պուրակ Սիւմեր։
Այսպէս Սայաթ Նովա երգչախումբի, մեր մեծ վարդապետի մահուան յիսնամեակին նուիրուած ներկայացումէն 34 տարիներ ետք կրկին կը ղողանջէ Սեւակի Անլռելի Զանգակատունը՝ այս անգամ Տատեան Վարժարանի Տիգրան Կիւլմեզկիլ հանդիսասրահին մէջ, 4 Նոյեմբեր 2019-ին նախ համայնքիս վարժարաններու աշակերտութեան համար ժամը 13.30-ին եւ ապա արուեստասէրներու համար ժամը 21.00-ին։
Կ՚արժէ նշել թէ կազմակերպիչները ապահոված են նաեւ փոխադրութեան սպասարկութիւն, քաղաքիս հայաշատ թաղերէն դէպի Պաքըրգիւղ։
Հաստատ համոզումով կ՚երաշխաւորենք թէ արտակարգ վայելք մը կը սպասէ մեզ, եւ ափսոսանք պիտի ապրին այդ վայելքէն անմասն մնացողները։
Շնորհաւորութիւն մտայղացման համար եւ յաջողութեան մաղթանք տատեանցիներուն։
