Կը վերանորոգուի Տիյարպէքիրի պատմական Սուրբ Կիրակոս եկեղեցին

ՈՒՅԿԱՐ ԿԻՒԼԹԷՔԻՆ

Տիյարպեքիրի պատմական Սուրբ Կիրակոս եկեղեցին ծանրօրէն վնասուած էր իր գտնուած Սուր թաղամասի մէջ տեղի ունեցած բախումներու պատճառաւ։ Անցեալին, երբ կառավարութիւնը չեղեալ համարեց քուրտ զինեալներու հետ տարած հաշտեցման գործընթացքը, բախումներ տեղի ունեցան քաղաքի այդ պատմական թաղամասին մէջ։ Բախումներու ընթացքին պետութեան զինեալ ուժերը արգիլեալ տարածք հռչակեցին եկեղեցւոյ գտնուած թաղամասը։ Ապա իրենք որպէս ռազմակեդրոն տեղակայուեցան եկեղեցւոյ մէջ։ Այդ օրերուն մամուլի էջերուն յայտնուեցաւ սրբապղծութեան՝ զանազան երեւոյթներ։

Շրջապատի եւ քաղաքաշինութեան նախարարութիւնը այժմ ձեռնարկած է եկեղեցին վերաշինելու աշխատանքին։ Այդ օրերուն վնասուած էր նաեւ քաղդէացիներու Մար Փեթիուն եկեղեցին եւս։ Կատարուած յայտարարութիւնով կ՚իմանանք, թէ վերաշինութեան աշխատութիւնները պիտի սկսին այս ամսուայ մէջ։

Տիարպէքիրի Սուրբ Կիրակոսը կը համարուի Միջին Արեւելքի մեծագոյն եկեղեցին։ Ան պաշտամունքէ դադրած էր 1960-ին եւ մինչեւ մօտ անցեալ կը պարզէր բաւականին տխուր պատկեր մը։ Ապա եկեղեցին հայ համայնքի նախաձեռնութեամբ վերանորոգուած եւ գործել սկսած էր 2011 թուականին։

2015-ի Նոյեմբերին տարածաշրջանի բազմաթիւ սրբատեղիներու կարգին վնասուած էր նաեւ Սուրբ Կիրակոսը։

Նշենք որ եկեղեցւոյ թաղականութիւնը երկար ժամանակէ ի վեր իշխանութիւններու հետ բանակցութիւններ կը վարէր եկեղեցին վերակերտելու համար։ Վերջերս թաղականութեան եւ Նախարարութեան միջեւ ստորագրուեցաւ համաձայնութիւն մը, որմէ ետք սկսաւ վերանորոգման գործընթացը։

Այս մասին թաղական խորհուրդի ատենապետ Էրկիւն Այըք բացատրութիւններ տուաւ «Ակօս»ին եւ ըսաւ, որ սկիզբը Նախարարութիւնը համամիտ չէ գտնուած վերանորոգութեան ծախսերը ստանձնելու։ «Բացատրեցինք թէ եկեղեցւոյ այս պայմաններով ներկայանալուն մէջ հայ ժողովուրդը որեւէ պատասխանատուութիւն չունի։ Ուրեմն արդար չէ որ ուրիշներուն գործած աւերը ինք հատուցէ։ Երկարատեւ բանակցութիւններէ վերջ Նախարարութիւնը ստանձնեց ծախսերը հոգալ եւ յառաջիկայ օրերուն պիտի սկսի վերաշինութեան աշխատութիւնը»։ Էրկիւն Այըք յաւելեց նաեւ թէ կը շարունակուի եկեղեցւոյ գտնուած տարածքին արգիլեալ գօտի ըլլալու երեւոյթը։ «Մենք ալ հազիւ յատուկ թոյլտուութեամբ կրնանք մտնել եկեղեցի» ըսաւ Էրկիւն Այըք։

Բաժանորդագրուէ!

Դուք կարող էք աջակցիլ «Ակօս»ին՝ բաժանորդագրուելով։ Բաժանորդագրուեցէք, նուիրէք կամ թողէք բաժանորդագրութիւն հետաձգուած։