Կարգը եկած է «Մերժիր Հանրապետականը» արշաւին
ԱԼԻՆ ՕԶԻՆԵԱՆ
Հայաստանի մէջ բերման ենթարկուելէ կարճ ժամանակ վերջ ազատ արձակուած ընդդիմադիր ղեկավար Նիկոլ Փաշինեան 23 Ապրիլին յայտարարեց ժողովուրդին յաղթանակը։ Փաշինեանի յայտարարութեան յաջորդեց Սերժ Սարգսեանի հրաժարման լուրը եւ Երեւան 11 օր տեւող բողոքի ցոյցերէն ետք մատնուեցաւ ցնծութեան մթնոլորտի։ Ժողովուրդը ողջագուրուեցաւ իրարու ու ապա ուրախութիւնը կիսեց 11 օր շարունակ դէմ առ դէմ մնացած ոստիկաններուն հետ։ Խնջոյքի սեղաններ սարքուեցան փողոցներու վրայ եւ ինքնաշարժներ իրենց ազդանշական աղմուկով թնդացուցին ամբողջ քաղաքը։
Սերժ Սարգսեանի վարչապետի պաշտօնէն հրաժարելէն ետք կը նախատեսուէր ժամանակաւոր վարչապետ Կարէն Կարապետեանի եւ Նիկոլ Փաշինեանի 25 Ապրիլ չորեքշաբթի օր մէկտեղումը։ Այդ հանդիպումը չիրականացաւ, քանի որ նախապէս Սերժ Սարգսեանի վարչապետութեան ուղղուած «Մերժիր Սերժին» շարժումը հետզհետէ կը վերածուի «Մերժիր Հանրապետականին» կարգախօսին։
Արդարեւ Նիկոլ Փաշինեան 24 Ապրիլին օտար երկիրներու թղթակիցներուն հետ ունեցած հանդիպման պահուն յայտնած է, թէ նոր վարչապետը Հանրապետական պիտի չըլլայ։ Ան աւելցուց նաեւ, թէ իր ներկայացուցած շարժումը կը վայելէ Հայաստանի հասարակութեան 90 տոկոսի աջակցութիւնը։ «Իսկ սփիւռքը անվերապահ մեր կողքին է» աւելցուց Փաշինեան։ Թղթակիցները ուզեցին գիտնալ, թէ ինք թեկնածու է՞ վարչապետութեան պաշտօնին։ «Եթէ ժողովուրդը նման պատասխանատուութիւն բեռցնէ ես չեմ մերժեր։ Ստիպուած ենք թափանցիկ ընտրութիւնները երաշխաւորելու։ Քաղաքական ճգնաժամը սկսաւ ժողովուրդին ընտրութեան արդիւնքներուն հաւատք չունենալով։ Ուրեմն մեր առաջին գործը պիտի ըլլայ ընտրութեան օրէնքը փոխել»։ Իսկ իշխանութեան հետ համաձայնելու վարկածին պատասխանելով յայտնեց, թէ Հանրապետական կուսակցութիւն մը այլեւս գոյութիւն չունի, մնացածը ուրուականն է միայն։
Մինչ այդ Հայաստանի սփորտի եւ երիտասարդութեան ժամանակաւոր նախարար Հրաչ Ռոստոմեան պահի թելադրանքը գնահատելով հրաժարեցաւ իր պաշտօնէն։ Ռոստոմեան մաս կը կազմէ Բարգաւաճ Հայաստան կուսակցութեան եւ այս շարժումն ալ միացած է ընդդիմադիրներու խմբակին։
Նիկոլ Փաշինեան 25 Ապրիլին հանդիպում մը ունեցաւ ԵՄ-ի անդամ երկիրներու դեսպաններուն հետ։ Այս հանդիպումէն ետք դիմատետրի իր էջի միջոցաւ յայտարարեց, թէ յառաջիկայ օրերուն պիտի տեսակցի նաեւ Ռուսիոյ դաշնութեան եւ ԱՄՆ-ի Երեւանի ներկայացուցիչներուն հետ։
Ռուսաստան բաւական չէզոք դիրք կը պահէ Հայաստանի քաղաքական ալեկոծումներու նկատմամբ։ Կրեմլի բանբեր Տիմիթրի Փեսքով գոհունակութիւն յայտնեց Հայաստանի մէջ կայունութեան պահպանման համար։ «Կը յուսանք թէ մօտ ապագային քաղաքական համաձայնութեան մը գլխաւոր գիծերը պիտի յստականանան»։ Փեսքով նաեւ ընդգծեց Հայաստանի կարեւորութիւնը եւ աւելցուց, որ Հայաստանի քաղաքական ալեկոծումները չեն ընկալեր Ուկրանիոյ նման յեղափոխութեան մը օրինակով։ Նշենք, որ Փաշինեանի կազմակերպած հանրահաւաքներու ընթացքին հակառուս կարգախօս մը չէ լսուած եւ յայտարարուած է թէ հաւանական կառավարութեան փոփոխութենէ մը ետք Ռուսաստանի հետ յարաբերութիւնը պէտք է նոյն եղանակով ընդանան։
Անշուշտ այս նշումները բաւականին կարեւոր են, քանի որ Սերժ Սարգսեանի ուղղուած քննադատութիւններէն մէկն ալ Ռուսիոյ նախագահ Փութինի հետ ունեցած սերտ կապերն էին։
Այս պահուն ուշադրութիւնները ուղղուած են խորհրդարանի ձայներու աղիւսակին։ Ելք դաշինքը եւ Բարգաւաճ Հայաստան միասնաբար ունին 40 պատգամաւորներ։ Եթէ Հանրապետական կամ Դաշնակցական կուսակցութիւններէ 13 ձայներ եւս ապահովուի, բաւարար է Նիկոլ Փաշինեանի վարչապետութեան համար։
Գոյացած յաղթանակի տրամադրութեան մէջ հիմա ծայր տուած է օլիկարխներու դէմ պոյքոթի արշաւ մը։ Փողոց իջնող զանգուածը օլիկարխներու պատկանող ընկերութիւններու ցանկեր կը ցրուեն եւ ժողովուրդը կը զգուշացնեն այդ ընկերութիւններէն առեւտուր չընելու համար։ Թերեւս քիչ մըն ալ այս պատկերը տեսնելով Կարէն Կարապետեան կ՚ազդարարէ թէ ներկայ ընթացքը կրնայ վնասել երկրի տնտեսութեան։
