«Կանուխ է եղելութիւնը յստակացնելու համար»
Պատուելի Պրանսընի Ամերիկա դառնալէն ետք տոլարի սակագինը իջաւ 6 ԹԼ-ի սահմանէն։ Սակայն տակաւին խնդրական է յառաջիկայ օրերու տնտեսական միջավայրը։ Միւս կողմէ ԱՄՆ նախագահ Թրամբ եւ Ամերկեան կեդրոնական պանքի միջեւ ալ լարուածութիւն մը կը նկատուի։ Շանթ Մանուկեան տարադրամի ապագայ զարգացումի մասին ակնկալութիւնները մեկնաբանեց «Ակօս»ի համար։
ԱՄՆ նախագահ Թրամբ մերթ տոլարի սակագնի բարձրացման, մերթ ալ սակարանի հաշուեցուցակներուն արժեզրկման համար մեղադրական յայտարարութիւններ կ՚ունենայ Կեդրոնական պանքի հասցէին։ Այս մեղադրանքները անպատասխան կը մնան, Կեդրոնական պանքը կը խուսափի բանավէճի մտնելէ, բայց դրամական շուկաները կ՚ունենան փոքր ինչ հակազդեցութիւններ։ Սակայն ոչ ոք կը սպասէ, թէ Թրամբ պիտի միջամտէ Կեդրոնական պանքի որոշումներուն։ Նման միջամտութիւնը շատ սուղ կրնայ արժել։ Հետեւաբար կը սպասուի, թէ եթէ շատ լուրջ դանդաղացում մը տեղի չունենայ Դեկտեմբեր ամսուն տոկոսները կրկին բարձրանան եւ նոյն ընթացքը պիտի շարունակուի 2019-ին եւս։ Ըստ երեւոյթի սղաճը Կեդրոնական դրամատան եւ շուկաներու ենթադրածէն աւելի բարձր պիտի ըլլայ, որու հետեւանքով տոկոսներն ալ համապատասխան կերպով պիտի բարձրանան։ Դարձեալ շատ հաւանական է, որ ներկայ անհանգստութիւնը շարունակուի մինչեւ միջանկեալ ընտրութիւններու, այսինքն 9 Նոյեմբերի տեւողութեամբ։ Տեմոքրաթականներու յաղթանակով դուրս գալու պարագային նոյնիսկ օրակարգի պիտի գայ Թրամբի պաշտօնանկութիւնը։ Եթէ Ծերակոյտը տեմոքրաթականներուն չանցնի, այն ատեն պաշտօնանկութեան խնդիր թէեւ չի մնար, բայց Թրամբ չի կրնար նաեւ իր կամքը կիրարկել եւ կրնայ հրաժարելու ստիպուիլ։ Այս հաւանականութիւններու մէջ բնականաբար որոշ չափով կ՚անտեսուին տնտեսական աղիւսակները իրենց տեղը զիջելով քաղաքական տուեալներու։
Աւելի յոռետես եմ Եւրոպական շուկաներու առումով, քանի որ 2009 թուականէն այս կողմ արձանագրուած բարձրացման գործօնը հասած է իր վերջակէտին։ Կրնանք վարկերու բարձրացում եւ տոլարի գերակշռութիւն մը տեսնել։
Պատուելի Պրանսընի ազատ արձակուելով Թուրքիոյ ուղղուած քաղաքական ռիսքերէն մէկը վերացած է։ ԱՄՆ-ի հետ քաղաքական շփումներու բարելաւումը պիտի նպաստէ նաեւ տնտեսական գործընթացին։ Բայց անդին կայ տակաւին Պարսկաստանի դէմ շրջափակումի խնդիրը, որ կը խոստանայ նոր գլխացաւ մը Թուրքիա- ԱՄՆ յարաբերութիւններու մէջ։ Քաղաքական ու աշխարհագրական սպառնալիքներու վերացումով տոլարը քիչ մը եւս կրնայ նահանջել Թրքական լիրայի դիմաց։ Բայց միւս կողմէ Թուրքիա ունի իր տնտեսական ճգնաժամերու պատկերը, որոնց գլխաւորն է սղաճը։ Այս բոլորը գումարելով կրնանք ըսել, որ անորոշութիւնը որոշ չափով վերացած է, բայց ամէն ինչ յստակացնելու համար դեռ շատ կանուխ է։
