Կ. Պոլսի Հայոց Պատրիարքը ժամանեց Մայր Աթոռ Սուրբ Էջմիածին
Յունիսի 6-ին Մայր Աթոռ Սուրբ Էջմիածին ժամանեց Կ. Պոլսոյ Հայոց Պատրիարք Ամենապատիւ Տ. Սահակ Արքեպիսկոպոս Մաշալեանը։
Այս առիթով Մայր Աթոռ Սուրբ Էջմիածնի միաբանները Կ. Պոլսոյ Հայոց Պատրիարքին թափորով առաջնորդեցին Սուրբ Յովհաննէս Մկրտիչ եւ Սուրբ Վարդան մատուռ–մկրտարան, ուր կատարուեցաւ Հրաշափառի արարողութիւն։
Մայր Աթոռ Սուրբ Էջմիածնի լուսարարապետ Գերաշնորհ Տ. Մուշեղ Եպիսկոպոս Բաբայեանը Մայր Աթոռի միաբանութեան անունով ողջունեց եւ բարի գալուստ մաղթեց Սահակ Պատրիարքին։
Այնուհետեւ Պոլսոյ Հայոց Պատրիարքը, գոհութիւն վերառաքելով առ Աստուած վերստին հայոց հոգեւոր կենդրոնին գտնուելու համար, իր օրհնութիւնը ու բարեմաղթանքները փոխանցեց Սուրբ Էջմիածնի միաբանութեան։
Յառաջիկայ օրերուն Ամենապատիւ Սահակ Պատրիարքը իր մասնակցութիւնը պիտի բերէ Մայր Աթոռին գումարուած Գերագոյն հոգեւոր խորհրդի ժողովին։
Տոնախմբութիւն Սուրբ
Գայանեանց կոյսերու յիշատակին
Յունիսի 6-ին Հայաստանեայց Առաքելական Սուրբ Եկեղեցին տօնեց Սուրբ Գայանեանց կոյսերու յիշատակը։
Տօնի առիթով առաւօտեան Մայր Աթոռէն եկեղեցականներու հանդիսաւոր թափորը առաջնորդուեցաւ Սուրբ Գայանէ վանք։ Թափորը մինչեւ Սուրբ Գրիգոր Լուսաւորչի կամար գլխաւորեց Կ. Պոլսի Հայոց Պատրիարք Ամենապատիւ Տ. Սահակ Արքեպիսկոպոս Մաշալեան՝ մարտիրոս սրբուհու մասունքը ամփոփող աջով օրհնելով բարեպաշտ ժողովուրդին։ Այնուհետեւ Պատրիարք Սրբազան Հայրը մասունքակիր աջը փոխանցեց Իրաքի Հայոց թեմի առաջնորդ Հոգեշնորհ Տ. Օշական Վարդապետ Կիւլկիւլեանին։
Սուրբ Գայանէ վանքի առջեւ թափորը դիմաւորեցին Մայր Աթոռի Վանորէից Տեսուչ Գերաշնորհ Տ. Արտակ Եպիսկոպոս Տիգրանեանը, վանքի հոգեւոր սպասաւորները ու բազմաթիկ հաւատաւոր հայորդիներ։
Սուրբ Գայանէ վանքին մէջ մատուցուեցաւ Ս. Պատարագ։ Պատարագիչն էր ԱՄՆ Արեւելեան Հայոց թեմի փոխառաջնորդ Հոգեշնորհ Տ. Սիմէոն աբեղայ Օտապաշեանը։ Օրուայ խորհրուրդի շուրջ քարոզեց Գեղարքունիքի թեմի առաջնորդական տեղապահ Հոգեշնորհ Տ. Պարթեւ Վարդապետ Բարսեղեանը։
Իր քարոզին Հայր Սուրբը, անդրադառնալով Սուրբ Գայանեանց կոյսերու կեանքին եւ նահատակութեան, ընդգծեց, որ սուրբ կուսանաց կեանքը, նահատակութիւնը սոսկ վարքագրութիւն չէ, այն պատմական անհերքելի իրողութիւն, որու դասերը ուսանելի են բոլոր ժամանակներուն եւ մանաւանդ մեր օրերուն, երբ յաճախ փորձ կ՚ընեն աղճատել, ոչնչացնել այնպիսի վեհ, նուիրական արժէքներ, ինչպիսիք են հաւատքը եւ նուիրումը։
«Սուրբ կոյսերու սխրանքը անմահ է եւ կը ոգեշնչէ ամենքս։ Անոնց սրբակենցաղ վարքը վարակիչ է մեզ համար, որպէսզի մեր կեանքը ապրենք ժուժկալ, հաւասարակշռուած եւ ամենակարեւորը պատասխանատուութեան բարձր զգացումով։ Մեր խօսքին ու գաղափարներուն հաւատարիմ, խօսքն ու գործը համարժէք ըզզան միմեանց, հաւատքը զօրեղ, իսկ հաւատարմութիւնը երկրի նկատմամբ անխորտակ» ըսաւ Հայր Պարթեւը՝ յորդորելով հաւատացեալներուն սուրբ կուսանաց բարեխօսութեամբ եւ ամուր հաւատքով կերտել իրենց անհատական կեանքը, հայրենիքի խաղաղութիւնը, ապահովութիւնը ու անվտանգութիւնը՝ յանուն ապագայի եւ յանուն եկող սերունդներու շէն ու բարօր կեանքի։
Միաբանական համագումարի մասնակցող հոգեւորականներու այցը «Ծիծեռնակաբերդ» եւ «Եռաբլուր» յուշահամալիրներ
Միաբանական համագումարի մասնակցող հոգեւորականները համագումարի 2-րդ օրը նուիրեցին յիշատակութեան արարողութիւններուն։ Հոգեհանգստեան կարգ կատարուեցաւ Մայր Աթոռի միաբանական գերեզմանատան, ապա՝ «Եռաբլուր» զինուորական պանթէոնի մէջ։ Ծիծեռնակաբերդի յուշահամալիրին միաբանները կատարեցին բարեխօսութեան կարգ։
