Էսաեանի եւ Մէրամէթճեանի ողջունելի նախաձեռնութիւնները
Հայ ազգը այս տարի կը նշէ իր երեք արժանի զաւակներուն, բանաստեղծ Յովհաննէս Թումանեանի, երաժիշտ Կոմիտաս վարդապետի, գործատէր ու բարերար Գալուստ Կիւլպէնկեանի ծննդեան 150-ամեակը։
19 Փետրուար 1869 Յովհաննէս Թումանեանի ծննդեան օրն է։ Նոյն 19 Փետրուար թուականը 2008-ին Հայաստանի Գրողներու միութեան նախկին նախագահ Լեւոն Անանեանի առաջարկով Հայաստանի մէջ ընդունուած է, իբրեւ գիրք նուիրելու օր։
Էսաեան վարժարանը այդ օր յատուկ միջոցառումով մը անդրադարձաւ թէ Ամենայն հայոց բանաստեղծի յոբելեանին եւ թէ իրականացուց գիրք նուիրելու ձօնուած միջոցառում մը։
Էսաեան սանուց միութեան սրահին մէջ տեղի ունեցող միջոցառման ելոյթ ունենալու համար հրաւիրուած էին ուսուցչաց հիմնարկի բազմամեայ վարչայիններէն տիար Արամ Գամպուրեան, «Ժամանակ» օրաթերթի խմբագրապետ Արա Գօչունեան, «Ակօս»ի հայերէն էջերու խմբագիր Բագրատ Էսդուգեան, «Փարոս» պարբերականի հրատարակութեան տնօրէն Մայտա Սարիս։
Էսաեանի տնօրէնութիւնը այս միջոցառման համար հրաւէր տարած էր նաեւ քոյր վարժարաններու աշակերտութեան, արդարեւ միութեան դահլիճը ամբողջովին լեցուն էր դպրոցական երիտասարդներով։
Միջոցառման ընթացքին Էսաեանի սաներն ալ բեմ բարձրացան օրուան իմաստին պատշաճող արտասանութիւններով եւ երաժշտութեամբ։
***
Փետրուար ամսուն 21-րդ օրը, «ՈՒՆԷՍՔՕ»ի կարգադրութեամբ համաշխարհային սահմանումով կը յիշուի մայրենի լեզուն։ Ափսոս որ, դարձեալ համաշխարհային գետնի վրայ մարդ արարածի սեփական այս յատկութիւնը, մայրենի լեզուն քաղաքական դրդումներով կը հանդիպի զանազան արգելքներու։ Այսպէս մեր երկիրը եթէ կարելի է բազում լեզուներու խօսուած աշխարհագրական տարածք մը համարել, նոյնպէս կարելի է դիտել իբրեւ բազում լեզուներուն անյայտ կորած տարածքը։ Ներկայիս եւս մեր աշխարհագրական հատուածի վրայ կարգ մը լեզուներ հասած են կորուստեան սեմին։ Դժբախտաբար անոնց կարգին կը յիշուի նաեւ արեւմտահայերէնը։
Այս իրողութեան մէջ յաւելեալ արժէք եւ իմաստ կը ստանայ Ֆերիգիւղի Մէրամէթճեան վարժարանի մայրենի լեզուի ձօնուած միջոցառումը, որ պիտի կայանայ 25 Փետրուար երկուշաբթի Ֆերիգիւղի եկեղեցւոյ Նազար Շիրինօղլու սրահին մէջ։
Այս կարգադրութեան հրաւէրը փոխանցելու համար «Ակօս»ի խմբագրատուն այցելեցին Ֆերիգիւղի աւարտական ութերորդ դասարանի աշակերտները, առաջնորդութեամբ իրենց ուսուցչուհի՝ Հերա Իսքենտէրօղլուի։ Ինչպէս իւրաքանչիւր նման բնոյթի այցելութիւն, Ֆերիգիւղի սաներու ներկայութիւնն ալ ուրախութեան առիթ էր մեր խմբագրատան մէջ։
Ողջունելի են Էսաեան եւ Մէրամէթճեան վարժարաններու գիրք նուիրելու օրուայ եւ մայրենի լեզուի օրուայ առթիւ կազմակերպած նախաձեռնութիւնները։
