Ճնշումները հետզհետէ կը սաստկանան
Տակաւին չէր խաղաղած «Ճումհուրիյէթ» թերթի լրագրողներուն դէմ կատարուած բանտարկութեան որոշումներու տեղի տուած ալեկոծումը, վրայ հասաւ Օսման Քաւալայի եւ իր գործընկերներուն դէմ գրի առնուած ամբաստանագիրի հրապարակումը։ Ինչպէս ծանօթ է, մարդու իրաւունքներու պաշտպան եւ հասարակական կազմակերպութեան գործիչ Օսման Քաւալա մօտ մէկուկէս տարի է, որ բանտարկուած է Սիլիվրիի արգելանոցը եւ դատաւորներ չէին կրցած իր դէմ ամբաստանագիր մը պատրաստել։ Վերջապէս թերթիս դէպի տպարան ուղարկուած ժամերուն հրապարակուեցաւ այդ ամբաստանագիրը, որ բնականաբար բաւական սուր արձագանգներու տեղի տալու յատկութիւն ունի։
Դատախազներ Օսման Քաւալան եւ իր 15 գործընկերները կը մեղադրեն երկրին մէջ իշխանափոխութեան ձեռնարկելու եւ այլ բնոյթի յանցանքներով։ Բացի Օսման Քաւալայէ ամբաստանագրին մէջ կը հանդիպինք Միւճելլա Եափըճը, Այշէ Փընար Ալապօրա, Ճան Տիւնտար, Հանտան Մելթեմ Արըքան, Հանզատէ Հիքմեթ Կերմիանօղլու, Ինանչ Էքմեքչի, Մեհմետ Ալի Ալապօրա, Մինէ Էօզէրտեն, Ալի Հաքան Ալթընայ, Շերաֆեթթին Ճան Աթալայ եւ Թայֆուն Քահրաման անուններուն, որոնց բոլորին դէմ կը պահանջուի ցկեանս բանտարկութիւն։
Ամբաստանագիրը ի մասնաւորի կը ծանրանայ «Կէզի» զբօսայգիի դէպքերուն վրայ պնդելով թէ մեղադրեալները 2013-ի այդ դէպքերուն համար 2011-էն սկսեալ պատրաստութիւններ տարած են։ Այստեղ յիշուած անուններէն մէկ մասը արդէն հեռացած են երկիրէն եւ հիմա դատարանը անոնց համար բերման որոշում առած է։ Այժմ այս մեղադրանքով բանտարկութեան մէջ են միայն Օսման Քաւալա եւ Եիղիտ Աքսաքօղլու։
