Չաւուշօղլու՝ «Սահմանները բանալու պայմանները չէ գոյացած»
Թուրքիոյ Արտաքին Գործոց Նախարար Մեւլուտ Չաւուշօղլու խորհրդարանի մէջ իր նախարարութեան պիւտճէի քննարկման նիստին գրաւոր պատասխանեց Ժողովուրդներու Ժողովրդավարութեան կուսակցութեան պատգամաւոր Կարօ Փայլանի հարցումներուն։
Փայլան նախարար Չաւուշօղլուին հարց տուած էր, թէ Թուրքիա ի՞նչ դիրք կը բռնէ Հայաստանի վարչապետ Փաշինեանի. «Պատրաստ ենք առանց նախապայմանի բանակցութիւններ վարելու» յայտարարութեան։
Արտ. Գործ. Նախարարը իբրեւ պատասխան նշեց թէ Հայաստանի հետ սահմանները փակելու որոշումը Հայաստանին 1993-ին Ատրպէյճանի հողերու գրաւելուն հետեւանքն է։ «Աւելի քան 26 տարիներէ ի վեր կը շարունակուի Հայաստանի յարձակողական ռազմավարութիւնը։ Հետեւաբար սոյն որոշումը վերացնելու համար ձեռնտու պայմաններ չէ գոյացած։ Թուրքիա- Հայաստան յարաբերութիւններու բնականոնացման համար պայման է Լեռնային Ղարաբաղի խնդրին լուծման ուղղեալ յստակ քայլերու դիմել։ Իրականութեան մէջ Վարչապետ Փաշինեան իշխանութեան եկած Մայիս 2018 թուականէն այս կողմ Ղարաբաղեան հիմնախնդրի խաղաղ լուծման համար յուսադրիչ ելոյթներ ունեցած է։ Սակայն ժամանակի ընթացքին ինք եւս տարուելով երկրի բազէներուն եւ սփիւռքի գործիչներուն, փոխած կ՚երեւի իր ռազմավարութիւնը։ Այս մասին փաստի մը բնոյթը ունի 5 Օգոստոսին արտասանած «Ղարաբաղը Հայաստան է եւ վերջ» խօսքը։ Բացի այդ ՄԱԿ-ի 74-րդ համագումարին ըսած էր, թէ «Թուրքիա Հայաստանի համար լուրջ սպառնալիք մըն է»։ Ի դէմ այս բոլորին, եթէ հայկական կողմը Ղարաբաղեան հակամարտութեան լուծման ուղղութեամբ համաշխարհային հասարակութեան ակնկալութիւններուն եւ միջազգային իրաւաբանութեան շրջագծին մէջ յստակ եւ մտերիմ քայլերու դիմէ, Թուրքիա ալ անպատասխան չի մնար»։
