Պոլսոյ Պատրիարքական Աթոռի պատմութիւնը պաստառի վրայ
Պատրիարքական Աթոռի մասին պատրաստուած վաւերագրական նոր ֆիլմի անդրանիկ ցուցադրութիւնը տեղի ունեցաւ 11 Հոկտեմբեր 2025, Շաբաթ երեկոյ, Աթոռանիստ Մայր Եկեղեցւոյ յարակից Որդւոց Որոտման Եկեղեցի-Մեսրոպ Բ. Պատրիարք Մշակոյթի Կեդրոնին մէջ:
Երեկոյեան ժամերգութենէն ետք, Որդւոց Որոտման Եկեղեցի-Մեսրոպ Բ. Պատրիարք Մշակոյթի Կեդրոնին մէջ տեղի ունեցաւ «Ինքնութեան արահետ. Պոլսոյ Պատրիարքական Աթոռը ժամանակներու մէջ» վաւերագրական ֆիլմի անդրանիկ ցուցադրութիւնը:
Հանդիսութեան կը նախագահէր Նորին Ամենապատուութիւնը, իր շուրջ ունենալով Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի ներկայացուցիչ, Արեւմտեան Եւրոպայի Հայրապետական Պատուիրակ եւ Ամենայն Հայոց Կաթողիկոսութեան Վատիկանի ներկայացուցիչ Գերշ. Տ. Խաժակ Արքեպս. Պարսամեանը, Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսի ներկայացուցիչ եւ Կաթողիկոսարանի Դիւանապետ Գերշ. Տ. Տաճատ Եպս. Աշըգեանը, Գերշ. Տ. Արամ Արքեպս. Աթէշեանը, միաբան հայրեր, քահանայից դասու անդամներ, Հայ Կաթողիկէ համայնքի Պատրիարքական կառավարիչ Գերյ. Տ. Վարդան Թ.Ծ.Վրդ. Գազանճեան, Սեւ Ծովեան Տնտեսական Համագործակցութեան Կազմակերպութեան Հայաստանի Հանրապետութեան մշտական ներկայացուցիչ Նայիրի Պետրոսեան: Ներկայ էին համայնքային հաստատութեանց վարիչներ ու հրաւիրեալներու բազմութիւն մը:
Բացման խօսքով հանդէս եկաւ Մարալ Սաթար եւ շնորհաւորեց Ս. Թարգմանչաց տօնը եւ Նորին Ամենապատուութեան գահակալութեան հինգերորդ տարեդարձը:
Ապա անդրանիկ ցուցադրութեամբ հսկայ պաստառի վրայ սփռուեցաւ «Ինքնութեան արահետ. Պոլսոյ Պատրիարքական Աթոռը ժամանակներու մէջ» վաւերագրական ֆիլմը: Ներկաները 98 վայրկեան տեւողութեամբ, ուշի ուշով դիտեցին Ժամանակ օրաթերթի ու Երեւանի «Ֆակտում» փաստավաւերագրական կեդրոնի կողմէ, Տիգրան Պասկեւիչեանի բեմագրութեամբ պատրաստուած ֆիլմը:
Ցուցադրութենէն ետք հրապարակային ասուլիս սարքուեցաւ Երանուհի Պալճըի զրուցավարութեամբ: Ասուլիսին մասնակցեցան Արժ. Տ. Տրդատ Ա. Քհնյ. Ուզունեան, Տիգրան Պասկեւիչեան, Արմէն Սարուհանեան եւ Յակոբ Քորթմոսեան:
Ապա խօսք առաւ Ժամանակ Օրաթերթի գլխաւոր խմբագիր Արա Գօչունեան եւ իր ուրախութիւնը յայտնեց նման գործ մը յաջողութեամբ աւարտած ըլլալուն ու հասարակութեան մատուցելուն համար: Ան դիտել տուաւ, որ սոյն ֆիլմը ձօնուեցաւ մեր Հոգեւոր Պետի գահակալութեան հինգամեակին, նաեւ համընկնեցաւ Ժամանակ օրաթերթի հոգելոյս աւագ խմբագիր Մարտիրոս Գօչունեանի մահուան յիսնամեակին։ Արա Գօչունեան յարգանքով յիշեց նորոգ հանգուցեալ ազգային բարերար Տիգրան Կիւլմէզկիլը, որու յիշատակի արծարծման հնարաւորութիւն պիտի տայ այս ֆիլմը։
Գօչունեան որդիական երախտիք յայտնեց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսին, որ Գերշ. Տ. Խաժակ Արքեպս. Պարսամեանը որպէս ներկայացուցիչ ուղարկած էր այս ցուցադրութեան: Նոյնպէս երախտիք յայտնեց Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսին, որ Գերշ. Տ. Տաճատ Եպս. Աշըգեանը որպէս ներկայացուցիչ ուղարկած էր: Ան շնորհակալութիւն յայտնեց Գերշ. Տ. Արամ Արքեպս. Աթէշեանին, որու Ընդհանուր Փոխանորդութեան շրջանին ու խրախուսանքով սկսած էր այս գործը:
Յատուկ շնորհակալութիւն յայտնեց ֆիլմի բեմագրութեան հեղինակ Տիգրան Պասկեւիչեանին։
Գօչունեան յարգանքով յիշեց երախտաշատ բարերար եւ Ս. Փրկիչ Ազգային հիւանդանոցի հոգաբարձութեան ատենապետ Պետրոս Շիրինօղլուի անունը, որ ակամայ կը բացակայէր, որու նուիրատուութեամբ իրականացած էր ֆիլմի արտադրութիւնը:
Գօչունեան իր խօսքի աւարտին մի առ մի յիշեց բոլոր անոնք, որոնք իրենց ներդրումը ունեցած էին ֆիլմի պատրաստութեան ու այս երեկոյթի կազմակերպութեան ընթացքին: Ան ըսաւ, որ այս ֆիլմը միասնականութեան կոչ է:
Ապա Հոգշ. Տ. Յարութիւն Վրդ. Տամատեան կարդաց Նորին Ամենապատուութեան օրհնութեան գիրը, որով մեր Հոգեւոր Պետը բարձր կը գնահատէր Տիգրան Պասկեւիչեանն ու իր գործը եւ այս առթիւ Աթոռոյս Մաղաքիա Պատրիարք Օրմանեան շքանշանը կը շնորհէր իրեն: Այստեղ մեր Հոգեւոր Պետը անձամբ կախեց շքանշանը Պասկեւիչեանի վիզը ու անգամ մը եւս շնորհաւորեց զինք:
Հուսկ՝ յուշանուէրներ յանձնուեցան վաւերագրական ֆիլմի պատրաստութեան ներդրում ունեցող անհատներուն ու հաստատութիւններուն:
Հանդիսութեան աւարտին ներկաներ անցան Յարութիւն Ամիրա Պէզճեան սրահ, ուր սարքուեցաւ ընթրիքի սեղան մը, որպէս հոգեճաշ Ճեմիլ եւ Աննա Թոփլայըճըներու յիշատակին: Նորին Ամենապատուութեան գահակալութեան հինգամեակին առթիւ կտրուեցաւ տարեդարձի կարկանդակը եւ մեր Հոգեւոր Պետի փակման խօսքով աւարտին հասաւ հանդիսութիւնը:
