«Պիթըլզ»ը` 53 տարի ետք
ԳԷՈՐԳ ԹՈՐՈՅԵԱՆ
1962-ին, Լիվըրփուլ քաղաքէն չորս դեռահաս երիտասարդներ, Beatles խումբը կազմելով, ոչ միայն հռչակաւոր դարձան, այլ նաեւ յեղափոխութիւն յառաջացուցին թէ՛ ռոք երաժշտութեան եւ առհասարակ արեւմտեան երգարուեստին մէջ։ Անոնց երգերը իրենց երաժշտութեան պարզութեամբ եւ ներկայացման ձեւով յեղաշրջեցին մինչ այդ ընդունուած չափանիշերը։ Անոնց հռչակը տարածուեցաւ աշխարհի չորս կողմը եւ դարձան սիրելիները միլինաւորներու։
Անգլիացի այս չորս երիտասարդներուն ոդիսականը երկար չտեւեց։ 1967-ին, խումբին տնօրէն Էփշթայնի կանխահաս մահէն ետք, տարակարծութիւններ սկսան խումբին հիմնական երկու անձնաւորութիւններուն՝ Ճոն Լենընի եւ Փօլ ՄըքՔարթնիի միջեւ։ Առաջին հերթին խումբը դադրեցաւ համերգներ տալէ։ 1970ին հրապարակուեցաւ անոնց վերջին ալպոմը՝ Let It Be-ն, որմէ ետք խումբը միանգամընդմիշտ բաժնուեցաւ։
2 Նոյեմբեր 2023-ին, «Պիթըլզ»ը նոր պատմութիւն կերտեց, երբ խումբին չորս անդամներուն (երկուքը մահացած) մասնակցութեամբ արձանագրուեցաւ Լենընի հեղինակած երգը։ Միաժամանակ պատրաստուեցաւ նոր տեսանիւթ մը եւ տեղադրուեցաւ «Եութուպ»ի վրայ։ Քանի մը շաբթուան ընթացքին դիտումներու քանակը անցաւ 40 միլիոնը։ Անկասկած որ դիտումներու այս քանակին մէջ դերակատար է «Պիթըլզ»ի սիրահարներուն կարօտախտը։
Բայց եւ այնպէս Լենընի գրած այս երգը իր ոճով եւ մեղեդայնութեամբ, փոքրիկ կտոր մը եւ վերյուշ մըն է պիթըլզեան երգերու ոճէն եւ երաժշտական աշխարհէն։ Լենընէն ետք ՄըքՔարթնիի կատարած դաշնաւորումը բարձր ճաշակի եւ մակարդակի հասցուցած են այս երգը։ Այս իրողութիւնը անգամ մը եւս կը փաստէ թէ Լենըն-ՄըքՔարթնի համատեղ զոյգը կը մնայ արեւմտեան երգարուեստին մէջ ամէնէն յաջողակը։
Խումբին անդամներէն Ճորճ Հէրիսըն, տակաւին 40 տարիներ առաջ, իր տուած մէկ հարցազրոյցին մէջ ըսած էր. «Պիթըլզ»ը պիտի գոյատեւէ նոյնիսկ առանց մեզի»։
Իրենց ծնունդէն 60 տարի ետք, չորս լիվըրփուլցիները, երկուքը անդենականէն, երկուքը արդէն ալեհեր պապիկներ, աննախընթաց իրագործում մը կատարեցին երգարուեստի մարզին մէջ, ձայանգրելով եւ նկարահանելով իրենց նոր եւ վերջին երգը եւ երգարուեստի աշխարհին նուիրելով պիթըլզեան նոր գոհար մը։
Now And Then-ը պիտի ըլլայ «Պիթըլզ»ի կարապի երգը։
(Ասպարէզէ ամփոփուած)
