Պայրամովի այցելութեան արձագանգները
Թուրքիոյ նախագահ Ռեչեփ Թայիփ Էրտողան Անգարայի իր նստավայրին մէջ ընդունեց Ատրպէյճանի Արտաքին գործոց նախարար Ճէյհուն Պայրամովը։
«Հանդիպման ընթացքին քննարկուեցաւ Ատրպէյճան-Հայաստան յարաբերութիւններու կարգաւորման ընթացքը։ Նախագահը ընդգծեց, որ Զանգեզուրի միջանցքի անյապաղ բացումը եւ համապարփակ խաղաղութեան համաձայնագիրի ձեռքբերումը կարեւոր են տագնապին կարգաւորման համար», կը նշուի Էրտողանի աշխատակազմի հրապարակած հաղորդագրութեան մէջ։
Պայրամովի հետ զրոյցին ընթացքին, Էրտողան նաեւ նշեց, որ պէտք է շարունակել Թուրքիոյ եւ Ատրպէյճանի միջեւ առեւտուրի ծաւալը մինչեւ 15 միլիառ տոլար հասցնելու ջանքերը եւ ընդգծեց, որ երկու երկիրներու շահերէն կը բխի սերտօրէն համագործակցիլ ուժանիւթի եւ փոխադրութեան բնագաւառներուն մէջ։
Ատրպէյճանի Արտաքին գործոց նախարարը Անգարայի մէջ հանդիպում մը ունեցաւ նաեւ իր թուրքիացի պաշտօնակից Հաքան Ֆիտանի հետ։ Այս հանդիպումէն ետք Հաքան Ֆիտան անդրադարձաւ Լաչին միջանցքի արգելափակման հետեւանքով Արցախի մէջ տիրող մարդասիրական ճգնաժամին։ Աւելի ճիշդ բացատրութեամբ Թուրքիոյ Արտաքին գործոց նախարարը անտեսեց արցախահայութեան մատնուած ծանր իրավիճակը եւ խնդիրը մեկնաբանեց պետական տարածքներու չափանիշով։ Ֆիտան յայտնեց թէ Լաչինը ատրպէյճանական հողամաս է, արդարեւ Ատրպէյճան ինք կը որոշէ թէ որ միջոցներուն պէտք է դիմէ։
Հաքան Ֆիտան նաեւ ուրացաւ բժշակական օգնութեան կարօտ հիւանդներու տեղաշրջժին դէմ յարուցուած արգելքները եւ պնդեց թէ անհրաժեշտ ապրանքի փոխադրութեան համար բաց է նաեւ այլընտրանքային ճանապարհները։ Յայտնի է, որ Ֆիտան իր այս խօսքերով կ՚ակնարկէ Աղտամի ճանապարհին, որ խստիւ մերժուած էր Արցախի իշխանութիւններու կողմէ։
Միւս կողմէ ԱՄՆ եւ ԵՄ-ի շրջանակներէն իրարայաջորդ կոչեր կը լսուին Լաչինի միջանցքը բանալու եւ արցախահայութեան դէմ գործադրուող շրջափակման վերջ տալու համար։
Նշենք որ Ճէյհուն Պայրամովի այցելութեան ընթացքին կրկին ու կրկին կրկնուեցաւ Զանգեզուրի Միջանցքի խնդիրը։ Նիւթ մը՝ որ յստակօրէն մերժուած է ՀՀ կառավարութեան կողմէ, բայց Թուրքիա եւ Ատրպէյճան յամառօրէն կը շարունակեն խնդիրը օրակարգի վրայ պահելու։
