Պատրիարքի ընտրութեան նախնական թուականները ճշդուած
Ինչպէս ծանօթ է տեղապահի ընտրութենէն ետք հանգրուան առ հանգրուան կը գործէ պատրիարքի ընտրութեան ընթացքը։ Կարգադիր Յանձնախումբի բանբեր փաստաբան Սեպուհ Ասլանկիլի յայտարարութեամբ յայտնի կը դառնայ թէ արդէն ճշդուած է ընտրութեան թուական մը։ Այսպէս 10 Դեկտեմբեր 2017 Կիրակի օր պիտի կայանայ պատգամաւորներու ընտրութիւնը։ Յաջորդող Չորեքշաբթի 13 Դեկտեմբերին ալ պատգամաւորները պիտի ընտրեն պատրիարքը։
Կարգադիր Յանձնախումբի պատրաստած աղերսագիրը Տեղապահ Սրբազանի կողմէ վաւերացուելէ ետք յանձնուած է Իսթանպուլի Կուսակալութեամբ։ Նախորդ գործադրութիւններու հիման վրայ կուսակալութիւնն ալ իր կարգին աղերսագիրը պիտի փոխանցէ Ներքին Գործոց Նախարարութեան։ Ընտրութեան վերջնական թուականը հազիւ նախարարութեան որոշումէն ետք է որ պիտի յստականայ։
Սեպուհ Ասլանկիլ կը յայտնէ թէ մինչ այդ կը շարունակուի ընտրողներու անուանացանկերու պատրաստութիւնը։ «Թաղական խորհուրդներուն գրաւոր կերպով յայտնեցինք իրենց տարածաշրջանի ընտրողներու թիւը յստակեցնելու մասին մեր պահանջարկը։ Կը կարծենք թէ մինչեւ սոյն ամսու աւարտին այդ ցանկերը պատրաստուած պիտի ըլլայ, որու հիման վրայ մենք ալ պիտի կրնանք ճշդել իւրաքանչիւր թաղի վիճակող պատգամաւորներու թիւը։ Տակաւին կ՚աշխատինք նաեւ պատրիարքութեան թեկնածուներու անունները յստակացնելու։ Եթէ թեկնածուներու թիւը հինգէն նուազ է արդէն խնդիր չունինք, բայց եթէ աւելի մեծ թիւով թեկնածուներ ներկայանան հոգեւորական դասը պիտի ստիպուի այդ անունները հինգով սահմանելու։ Հազիւ այդ հանգրուանէն ետք է որ պատգամաւորութեան համար թեկնածուներու դիմումները պիտի ընդունինք։ Ուշագրաւ է այն մանրամասնութիւնը որ պատգամաւորները պիտի չկարենան հրապարակել թէ իրենք ո՞ր թեկնածուի ի նպաստ պիտի քուէարկեն։ Բաւական խնդրայարոյց կ՚երեւի այս մանրամասնութիւնը, քանի որ խնդիրը ոչ թէ պատգամաւոր ընտրելու, այլ պատրիարք ընտրելու մասին է։ Հետեւաբար ընտրողներու ամենաարդար իրաւունքը պիտի ըլլայ գիտնալ թէ որ պատգամաւորը, որու հաշւոյն պիտի աշխատի»։
Երկար ժամանակէ ի վեր բանավէճի նիւթ դարձած երեւոյթ մըն է այս, որ կը կարօտի որոշ բարեփոխութեան եւ սակայն այդ բարեփոխութիւնը կարելի չէ իրականացնել, ճիշդ ալ ընտրութեան սեմին։
