Պատրիարք Սրբազանի հակազդեցութիւնը
Թուրքիոյ մէջ ատելութեան պատգամի նմուշները շատ անգամ կը ներկայանան հայատեացութեամբ։ Այս բնոյթով վերջին ելոյթը եկաւ Պոլուի քաղաքապետ Թանժու Էօզճանէն։ Այս վերջինս արդէն ծանօթ է ժողովուրդներու հանդէպ սնուցած ատելութիւնով։ Ան մօտ անցեալին բազում անգամներ ատելութեամբ արտայայտուած էր սուրիացի գաղթականներու հանդէպ։
Արդարեւ Թուրքիոյ Հայոց Սահակ Բ. Պատրիարքը քննադատեց Պոլուի քաղաքապետի վարքը, յատուկ յայտարարութիւնով մը։
«Հայ համայնքը, որ դարեր շարունակ ապրած է այս հողերուն վրայ, այս երկրին արմատական եւ անբաժանելի մասն է։ Այս հնագոյն ժողովուրդը պատմութեան ընթացքին նշանակալի ներդրում ունեցած է այս հողերուն մէջ մշակութային, տնտեսական եւ ընկերային առումներով, եւ այսօր ալ նոյն վճռակամութեամբ կը շարունակէ իր գոյութիւնը։
Վերջերս հանրութեան ուշադրութեան արժանացած, Պոլու քաղաքապետ Թանժու Էօզճանի հայկական ինքնութեան դէմ ուղղուած ատելութեան խօսքերը ոչ միայն ժողովուրդ մը կը թիրախաւորեն, այլեւ բացայայտօրէն կը թիրախաւորեն մեր հասարակաց անցեալն ու միասին ապրելու մեր կամքը։
Այսպիսի խօսքերը ո՛չ երէկ ո՛չ ալ այսօր ծառայած են եղբայրութեան, միութեան եւ հասարակական խաղաղութեան, եւ յետայսու ալ պիտի չծառայեն։ Ատելութեան լեզուի օրինականացումը, հասարակական խաղաղութիւնը սպառնացող խտրական արտայայտութիւններու անտեսումը բնաւ հանդուրժելի չեն։
Այս առիթով, իշխանութիւններուն եւ հանրութեան կը հրաւիրենք աւելի պատասխանատու լեզու գործածելու, եւ հայ համայնքը, որեւէ ազգ կամ ցեղ թիրախաւորող ամէն տեսակի խտրական եւ մեկուսացնող խօսքը ամենէն ուժեղ կերպով կը դատապարտենք։ Հասարակութիւններու միասին ապրելու հիմքը հաւասարութիւնը, յարգանքն ու հասարակաց արժէքներու մէջ հանդիպիլն է։ Այս սկզբունքները վնասող իւրաքանչիւր մօտեցում ոչ միայն փոքրամասնութիւնները, այլեւ ամբողջ հասարակութիւնը կը վիրաւորէ»։
Նշենք որ Ասորի Կաթողիկէ համայնքի առաջնորդ Օրհան Չանլըն ալ նման տողերով մեղադրած է Թանժու Էօզճանը։
Պարտինք նշել թէ տխրահռչակ քաղաքապետի անդամակցած Ժողովրդահանրապետական կուսակցութեան շարքերէն ալ ցարդ ոչ մէկ դժգոհութեան արձագանգ հնչած է այս գայթակղութեան դիմաց։
