Արուեստի ու մշակոյթի նուիրուած 20 տարի
Յայտնի գործատէր եւ մտաւորական, այժմ քաղբանտարկեալ Օսման Քաւալայի կարեւորագոյն նախաձեռնութիւններէն է «Անատոլու Քիւլթիւր» ընկերութիւնը։ Այս տարի ընկերութիւնը զանազան միջոցառումներով կը նշէ հիմնադրութեան 20 ամեակը։
20 ամեակը վերաքաղի մը առիթ ընձեռած է, ուր կը յիշուին այս ընկերութեան անցեալի մէջ կատարած կարեւոր գործերը։ 30 Նոյեմբեր հինգշաբթի երեկոյ, Տեփոյի մէջ կայացած ասուլիսն ալ այդ միջոցառումներու շարքէն էր։ Անատոլու Քիւլթիւրի վաստակաւոր աշխատակիցներէն Թամար Նալճըի ժողովավարութեամբ կայացող միջոցառման խորագիրն էր «Թուրքիոյ մէջ զանազանութիւնը եւ Հայաստանի հետ համագործակցութիւն»։ Այս խորագրին ներքեւ երաժշտագէտ Պուրճու Եըլտըզ, ճարտարապետ Իսմայիլ Եաւուզ Էօզքայա, գեղանկարիչ Գրիգոր Սահակօղլու եւ ակադեմական Սալիմ Այքութ Էօզթիւրք իրենց մասնակցած աշխատութիւններէն օրինակներ թուելով անդրադարձան Հայաստանի գործընկերներու հետ համատեղ կատարուած բազմաբնոյթ աշխատութիւններուն։
Այսպէս Պուրճու Եըլտըզ յիշեց Քարտէշ Թիւրքիւլեր եւ Սայաթ Նովա Երգչախումբի Հայաստանեան երկու համերգները եւ ընդգծեց ողբացեալ Սեպուհ Սղբազան Չուլճեանի իրենց հանդէպ ցուցաբերած մտերմութիւնը։ Եըլտըզ նաեւ ծանրացաւ 1915-ի դարադարձին կատարուած «Ին Մեմորեըմ» եւ Կոմիտաս վարդապետի յիշատակին ձօնուած համերգները։ Ճարտարապետ Իսմայիլ Եաւուզ Էօզքայա խօսեցաւ մշակութային ժառանգի պահպանման առումով Անիի աւերակներու մօտ կատարուած աշխատութիւններուն։ Գեղանկարիչ Գրիգոր Սահակօղլու, որ անցեալին զանազան որմազդներ պատրաստած էր «Անատոլու Քիւլթիւր»ի միջոցառումներուն համար, պատմեց իր ալ մասնակցած «Թերի» նախագծի մասին։ Իսկ տոքթ. Սելիմ Այքութ Էօզթիւրք որ առցանց կը մասնակցէր Քոփենհակնէն, խօսեցաւ Հայաստանի եւ Թուրքիոյ երիտասարդ մանսակիցներու երկխօսութեան փորձերուն մասին։
