Արդէն մեկնարկած է պատրիարքի ընտրութեան գործընթացը Ի
Ինչպէս կը նախատեսուէր, Ս. Զատկի տօնի աւարտին մեկնարկած է պատրիարքական ընտրութեան գործընթացը։ 29 Ապրիլ 2019-ի յետմիջօրէին, պատրիարքարանի մէջ գումարուած Կրօնական ժողովը ձայներու մեծամասնութեամբ որոշած է ընտրութեան գործընթացը տանիլ փոխանորդի միջոցաւ։ Այս ուղղութեամբ քուէարկած են հինգ հոգեւորականներ։ Երեքը կողմ եղած են տեղապահի մը ընտրութեան եւ մէկը ձեռնպահ մնացած։ Այս մասին պատրիարքարանէն ուղարկուած զեկոյցին մէջ կը նշուի Իսթանպուլի կուսակալութեան անյապաղ դիմում կատարելու մասին։ Արդարեւ այդ դիմումը անմիջապէս յաջորդ օր կատարուած է Իսթանպուլի կուսակալութեան։ կուսակալը խոստացած է աղերսագիրը իսկոյն փութացնել Անգարա, պատկան մարմիններու ուշադրութեան յանձնելու համար։
Գործընթացի առաջին հանգրուանին իսկ կատարուած կանոնի զանցառութիւնը տեղի տուած է կարգ մը դժգոհութիւններու։ 1863-ի սահմանադրութիւնը, որ հիմքը կը հանդիսանայ պատրիարքի ընտրութեան գործընթացին, յստակօրէն կը թելադրէ տեղապահի ընտրութիւնը։ Այժմ նոյն գործընթացը փոխանորդի առաջնորդութեամբ տանիլը իր մէջ անկանխատեսելի խոչընդոտներ կրնայ յառաջացնել։ Սակայն ըստ երեւոյթի, ուշադրութիւնը կեդրոնացած է ժամ առաջ ընտրութիւն կատարելու վրայ եւ այս պահուն շատերու համար նշանակութիւն չունի տեղապահի կամ փոխանորդի մասին տարակարծութիւնը։ Բայց պէտք չէ մոռնալ թէ այս փուլի նախապատուութիւններու ետին կայ յաջորդ հանգրուաններու վերաբերող ռազմավարութիւններ։
