Արդարութեան համաժողով
ՈՒՅԿԱՐ ԿԻՒԼԹԷՔԻՆ
Հանրապետական Կուսակցութիւնը Անգարայէն Իսթանպուլ կատարած քայլարշաւէն ետք հիմա ալ կը պատրաստուի Չանաքքալէի մէջ արդարութեան համաժողով մը կազմակերպելու։ 26-29 Օգոստոս թուականներուն Չանաքքալէի մէջ իրականանալիք համագումարին կը նախատեսուի շուրջ տասը հազար մասնակցութիւն։ Համաժողովի ընթացքին ճշդուած են արդարութեան ութը խորագիրներ։ Այսպէս «Դատարանի մէջ արդարութիւն», «Պետութեան մէջ արդարութիւն», «Ընտրութեան մէջ արդարութիւն», «Ապրուստի արդարութիւն», «Հաւատքի արդարութիւն», «Ուսման արդարութիւն», «Կեանքի արդարութիւն», «Մետիայի մէջ արդարութիւն»։ Արդարութիւն խորագրերու ներքեւ զանազաններու կողքին ելոյթ պիտի ունենան նաեւ «Ակօս»ի հայերէն էջերու խմբագիր Բագրատ Էսդուգեան եւ Յունաց Փաննայյա Եկեղեցւոյ թաղական խորհուրդի ատենապետ Լաքի Վինկաս։ Իսկ «Կրթութեան մէջ արդարութիւն» խորագրեալ ասուլիսին ելոյթ պիտի ունենայ Պաքըրգիւղի Տատեան Վարժարանի հիմնադիրի ներկայացուցիչ Արսէն Արշըք։ Համագումարին հետեւելու համար դիմում կատարած բազմաթիւ լրատուամիջոցներու կողքին գրանցում կատարած է նաեւ Հայաստանի Պետական Հեռուստակայանը։
Կուսակցութեան Իսթանպուլի պատգամաւոր Սելինա Տողան նախատեսուած ծրագրին համար «Ակօս»ին տուաւ հետեւեալ բացատրութիւնները. «նախորդ տարուայ 15 Յուլիսին կատարուած անյաջող յեղափոխութեան փորձէն ետք երկիրը սկսաւ ղեկավարուիլ արտակարգ իրավիճակի դրութիւնով։ Սակայն ժամանակի ընթացքին արտակարգ իրավիճակը վերածուեցաւ սովորականին։ Մինչեւ այսօր 26 օրէնքի լիազօր որոշումներ հրապարակուեցան, որոնց հետեւանքով 108 հազար մարդ կորսնցուց իր աշխատանքը։ Անոնց մէջ ակադեմականներ, մարդու իրաւունքներու պաշտպաններ եւ երեսփոխաններ։ Իրենց աշխատութեան վերատիրանալու համար հացադուլի դիմած Նուրիյէ եւ Սեմիհ արդէն կը գտնուին մահուան սպառնալիքին հետ դէմհանդիման։ Նոր դրութիւնը սկսած է անարդարութիւն արտադրել։ Արդարութիւնը ամբողջ հասարակութեան առաջին կարգի պահանջն է։ Բոլորս կը կարօտինք անոր։ Ահա այս հանգրուանին է որ մեր կուսակցութիւնը ձեռնարկեց Թուրքիոյ պատմութեան կարեւորագոյն երթերէն մէկուն։ Կուսակցութեան նախագահ Քեմալ Քըլըչտարօղլու իր հետ ունենալով բազմաթիւ կուսակցականներ կամ համակիրներ, աւելի քան 450 քմ. Ճանապարհ անցաւ արդարութեան ձայնը լսելի դարձնելու համար, իսկ այժմ այդ պահանջը աւելի յստակ ներկայացնելու համար կը դիմենք այս համաժողովին։ Համաշխարհային չափանիշով զանգուածային եւ բռնութենէ զերծ այս տեսակի միջոցառումները կը բնորոշեն նաեւ քաղաքական դաշտը։ Հասարակութեան բոլոր խաւերէն ներս մասնակիցներու առկայութիւնը ապահովել կ՚աշխատինք։ Թուրքիոյ փոքրամասնութիւններն ալ իրենց կարգին արդարութեան պահանջներ ունին, որոնք եւս իրենց արձագանգը պիտի գտնեն այս համագումարի միջոցաւ»։
