«Արաս»ի խոհանոցի ձօնուած նախաձեռնութիւնը
Համավարակի օրերը, երբ արար աշխարհ մատնուած էր տնային կալանքի, ունեցաւ շատ հետաքրքրական հետեւանքներ։ Մարդիկ առցանց դրութեամբ ապսպրած նախանիւթերով մտան խոհանոց եւ փորձեցին նոր համեր գուշակել։ Ապա այդ գիւտերը սոցցանցերու միջոցաւ բաժնեցին իրարու հետ։
Խոհանոցը ուշադրութեան առանցքը կը կազմեր։
Իրերայաջորդ կը հրատարակուէին գիրքեր, ուր ընթերցողը կը յայտնաբերէր իրեն համար ցարդ անծանօթ բազմաթիւ ուտեստեղէնի բաղադրատոմսեր։
Քանի որ մշակութային արժէքներու ցուցակի մէջ յատուկ տեղ կը գրաւէր խոհանոցը, այս բաղադրատոմսերն ալ իրենց կարգին տարբեր մշակոյթներու ծանօթանալու համար բանալիի մը ազդեցութիւնը ունեցան։
Միւս կողմէ համացանցը տնային կալանքի մատնուած մարդկանց համար իրարու հետ հաղորդակցման նոր ոլորտ մըն ալ ստեղծեց։ Մարդիկ բջջային հեռախօսներով կամ համակարգիչներով կարծեցեալ հանդիպումներ ծրագրեցին։ Իւրաքանչիւրը իր բնակարանէն մասնակցեցաւ մերթ քաղաքական կամ ընկերային բանակումներու, մերթ խմիչքի սեղաններու եւ նոյնիսկ մերթ ալ համերգներու։
Թան Մորկիւլ եւ Մեհմետ Ալի Ալապորա այդ օրերուն է որ հիմնեցին gather-in հարթակը։
Ուրախութեամբ կը տեղեկանանք թէ «Արաս» հրատարակչատունը գործակցելով այս հարթակին հետ, պատրաստած է սեղանի զրոյցներու շարք մը։ Այսպէս 16 Հոկտեմբերին Թագուհի Թովմասեան կը պատմէ իր հեղինակած «Մեր Շեն Սեղանէն» անուն գիրքի ոդիսականը։ 23 Հոկտեմբերին Նատիա Շեներ կը ներկայացնէ ասորի խոհանոցէն յատկանշական համ մը «քիթել,»ը։ 30 Հոկտեմբերին Սասուն Էսդուգեան կը խօսի Իսթանպուլի եւ Անտիոքի խոհանոցային մշակոյթի մասին։ 6 Նոյեմբերին Սիլվա Էօզյէրլի նիւթ կ՚ունենայ Ամիտայի ճաշատեսակները։ 13 Նոյեմբերին Պօղոս Եղիազար ընդհանուր ակնարկ մը կը սեւերէ Կիլիկիոյ Թագաւորութեան արքայական սեղանին։ 20 Նոյեմբերին Թամար Պալ նոր տեսանկիւնով մը կը դիտէ աւանդականացած կարգ մը բաղադրատոմսեր։ Իսկ 27 Նոյեմբերին գինիի մասնագէտ Լեւոն Պաղըշ կը խօսի Իսթանպուլի յատուկ համերու մասին, միշտ նկատի ունենալով անոնց ալքոհոլային խմիչքներու հետ համերաշխութիւնը։
Բոլոր զրոյցները պիտի հրատարակուին նոյն ժամուն՝ 20.00-ին։
