Առարկութիւններ Վաքըֆներու տնօրէնութեան շրջաբերականին դէմ
ՈՒՅԿԱՐ ԿԻՒԼԹԵՔԻՆ
Երբ բոլոր ուշադրութիւնները կեդրոնացած էին Մեսրոպ Պատրիարքի վախճանման եւ յուղարկաւորութեան նիւթերուն, Վաքըֆներու ընդհանուր տնօրէնութիւնը շրջաբերական մը հրատարակելով նոր խոչընդոտի մը ծնունդ տուաւ։ Ինչպէս ծանօթ է շուրջ վեց տարիներ առաջ ջնջուած էր փոքրամասնութեան համայնքներու հաստատութիւններու ընտրութիւնը դասաւորող կանոնագիրը։ Նոր շրջաբերականը խորհուրդ կու տայ անցնող ժամանակի ընթացքին մահուան կամ հրաժարումի բերումով թափուր մնացած անդամակցութիւնները ամբողջացնել նշանակումի դրութիւնով։
Իրաւաբան Սեպուհ Ասլանկիլ կը յայտնէ, թէ ապօրէն է այս շրջաբերականը։ «Շրջաբերականը պատրաստուած է ընտրութեան գործընթացը խափանելու միտումով։ Կարգ մը թաղական խորհուրդներ կան, որոնք կը ներկայանան միայն մէկ անունով։ Այս շրջաբերականը, այդ մէկ անունին իրաւասութիւն կու տայ, այլ վեց անուններ եւս նշանակելու եւ կազմը ամբողջացնելու համար։ Թէ վարչութիւնները եւ թէ անհատները իրաւունք ունին շրջաբերականը չեղեալ համարելու համար դատարան դիմելու»։
Հաստատութիւններու ընտրութեան մասին նախագիծ մը պատրաստող խումբին մէջ պաշտօն ստանձնած իրաւաբան Արման Աթընըզ ալ առարկութիւններ ունի վերջին շրջաբերականի նկատմամբ։ «Նախորդ կանոնագրի հիման վրայ կատարուած ընտրութիւնները ընդունելի էին մեծ բնակչութիւն ունեցող թաղերու պարագային։ Իսկ Պէյօղլու, Պալատ կամ Էյիւպի նման բնակչութիւնը նօսրացած թաղերուն մէջ կանոնագիրը մեծ դժուարութիւններու պատճառ կը դառնար։ Բնակչութենէ զուրկ այդ թաղերուն մէջ ընտրութիւնները կը կայանային քանի մը անձերու կարգադրութեամբ։ Վերջին կարգադրութիւնը շատ ձեռնտու է իրենց աթոռը թողուլ չուզողներուն համար»։
Ժողովուրդներու Ժողովրդավարութեան կուսակցութեան պատգամաւոր Կարօ Փայլան շրջաբերականը փոխանցեց Խորհրդարանի օրակարգին։ Փայլան գոյացած անընդունելի իրավիճակը պատասխանելու պահանջով գրաւոր դիմում մը ներկայացուց Վաքըֆներու ընդհանուր տնօրէնութեան վրայ պատասխանատուութիւն ստանձնած Մշակոյթի եւ զբօսաշրջութեան նախարար Մեհմետ Նուրի Էրսոյին
