Արամեան Սանուց Միութեան «Հայֆէստ»ը
Նախորդ տարիներուն ողբացեալ Մեսրոպ Պատրիարք ամառուայ ամիսներուն իր մօտ կը հրաւիրէր պոլսահայ սանուց միութիւններու վարիչները եւ հարց կու տար, թէ ի՞նչ պատրաստութիւն ունին Թարգմանչաց Տօնի շաբթուան համար։ Ընդհանրապէս կը նկատէր, թէ յատուկ պատրաստութիւն մը չեն կատարած, ինք խորհուրդներ կը փոխանցէր զանազան միջոցառումներու ձեւաչափով։
Այսօր այդ ծիրէն ներս ալ կը տիրէ անտարբերութեան մթնոլորտը։ Բարեբախտաբար Արամեան Սանուց Միութիւնը Սրբոց Թարգմանչաց Տօնի ձօնուած «Հայֆէստ»ը կազմակերպեց, որուն բացումը կատարուեցաւ թատերական ներկայացումով մը։ 11 Հոկտեմբեր Ուրբաթ գիշեր Արփի թատերախումբը «Թուլիկ» խորագրեալ հայերէն խաղով բեմ ելաւ Արամեանի սրահիս մէջ։
12 Հոկտեմբեր Շաբաթ օր, Արամեան Ունճեան եւ Գալֆաեան Վարժարաններու աշակերտներուն մասնակցութեամբ խանդավառ մթնոլորտ մը ստեղծուեցաւ եւ տղաքն ու ծնողները մէկտեղուեցան սրահին մէջ։ Բացումը կատարուեցաւ յանուն Սանուց Միութեան Մարալ Էպէօղլու Սաթարի կողմէ։ Ան անդրադարձաւ ծառերուն եւ անտառներուն կարեւորութեան եւ ապա շարունակեց մագաղաթին ու գլխաւորութեամբ Ս. Մեսրոպ Մաշտոցի եւ Ս. Սահակ Պարթեւի ինչպէս բոլոր թարգմանիչ վարդապետներու գիւտին ու գործին կարեւորութեան մասին։
Այս առթիւ կազմակերպուած էին զանազան աշխատանոցներ հայերէնով։
«Փոքրիկ»ի նախաձեռնութեամբ երկու հէքեաթներ ներկայացուեցան Գարօլին Մամիկոնեանի կողմէ, որմէ ետք մեկնարկեց աշխատանոցները։ Հոն ներկայ էին նաեւ ծնողները։ Միասնաբար ունկնդրելէ եւ լուսանկարուելէ յետոյ ծնողները գացին միութեան «Կենաց ծառ» խմբակի կողմէ կատարուած յախճապակիի աշխատանոցը եւ տղաքը իրենց յարմար խմբակներով անցան խաղի, ներկի, գրական եւ շուտասելուկի աշխատանոցներուն։ Աշխատանոցները վարեցին Թանիա Հանչէր, Մարալ Էպէօղլու Սաթար, Եւգինէ Ինճիտիւզէն, Աննա Սարը Սէչկին։ Ծնողներէն ոմանք եւ համայնքիս ծանօթ դէմքեր ամբողջ օրուայ տեւողութեամբ կամաւոր աշխատեցան եւ օգնեցին Հայֆէստի գործունէութիւններուն։ Նաեւ մանկանց գիրքերով ներկայ էր Արաս Հրատարակչութիւնը։
Միջոցառման ընթացքին միութիւն այցելելով օրհնութիւնները տուաւ Պատրիարքական Տեղապահ Սահակ Եպսկ Մաշալեան։ Ներկայ գտնուեցան Յարութիւն Աբեղայ Տամատեան եւ Գատըգիւղի Սուրբ Թագաւոր Եկեղեցւոյ երէց Գրիգոր Քհնյ Տամատեան։ Սանուց Միութեան ատենապետ Սեւան Աթաօղլու այցելուներուն բացատրութիւններ տուաւ աշխատանոցներուն գործունէութեան մասին։
«Հայֆէստ»ը աւարտին հասաւ նոյն գիշեր անուանի երգիչ Պարթեւին հաճելի տոհմիկ երգերով։
