Արամ Կաթողիկոս ահազանգ կը հնչեցնէ
Սուրիոյ հիւսիսային հատուածի մէջ գտնուող Տէր Զօրի շրջանը խորհդանշական է Հայոց ցեղասպանութեան եւ տարագրութեան իբրեւ վերջին հանգրուան։ Արդարեւ Արեւմտեան Հայաստանի քաղաքներէն եւ Անաթոլիայէն աքսորուած հայերը դաժան ճամբորդութեամբ հասած էին Տէր Զօր, ուր հոն եւս մատնուեցան զանգուածային սպանդներու։ Այս բոլորը խորհրդանշող կառոյց մըն էր Սրբոց Նահատակաց Եկեղեցիի համալիրը, որ այսօր ամբողջովին խոնարհած է։
Կիլիկիոյ Կաթողիկոսարանի հեռուստակայանը վերջերս տեղադրած տեսանիւթով մը ցոյց կու տայ եկեղեցւոյ անցեալի եւ ներկայի տեսարանը։
Տաճարը առաջին անգամ 2014-ին ենթարկուած էր Իսլամ Պետութեան ռմբակոծումներուն եւ մասամբ փլած։
Երկրորդ յարձակումը՝ որ կայացած է եկեղեցւոյ սիւներուն զետեղուած պայթուցիկ սարքերու պայթումով, ամբողջովին փլած է։ Համալիրը կը բաղկանար բացի եկեղեցիէ մատենադարան, թանգարան, խորհրդարան եւ այլ յարակից բաժիններէ։
Տեսանիւթի մէջ կը նշուի, որ Արամ Ա. Կաթողիկոս այցելութիւն մը պիտի կատարէ Սրբոց Նահատակաց Եկեղեցւոյ աւերակներուն, երբ պայմանները ձեռնտու ըլլան։
