Անպատուաբեր զարգացումներ հայ եկեղեցւոյ դիմաց
Հայ եկեղեցւոյ նուիրապետական չորս աթոռներէն Երուսաղէմի Պատրիարքարանի համար բաւական աղմկայարոյց էր նախորդ շաբաթավերջը։ Յորդանանի Թագաւորութիւնը եւ Պաղեստինի կառավարութիւնը նոյն օր կը հրապարակէին, թէ չեն ճանչնար Նուրհան Մանուկեան Պատրիարքի հանգամանքը։ Նման որոշումի ետին կայ հսկայածաւալ զեղծարարութիւն մը։ Մօտ անցեալին արդէն բաւականին լուրջ քննադատուած էր համայնքապատկան կալուածի մը իսրայէլեան ընկերութեան 99 տարի ժամկէտով վարձակալուելու խնդիրը։ Ստորեւ մեր ընթերցողներուն կը ներկայացնենք Միաբանական ընդհանուր ժողովի Դիւանի կողմէ հրապարակուած յայտարարութիւնը։
«13 Մայիս, 2023-ին հրաւիրուած արտահերթ Միաբանական ժողովը, որուն կը մասնակցէին Սուրբ Երկրի մէջ ծառայող միաբան հայրերը, իր խոր մտահոգութիւնը յայտնեց Մայիս 11-ին հրապարակուած Յորդանանի Հաշիմական Թագաւորութեան եւ Պաղեստինեան կառավարութեան որոշման առնչութեամբ, որով սառեցուած է Երուսաղէմի Հայ Պատրիարք՝ Ամեն. Տ. Նուրհան Արք. Մանուկեանի պատրիարքական ճանաչումը։
Միաբանական Ժողովը առաւել մտահոգ է եւ անակնկալի եկած այն փաստէն, որ այս որոշումը կը յաջորդէ Երուսաղէմի Հայ Պատրիարքի եւ Տնօրէն Ժողովի երեք կարեւոր եւ վճռական որոշումներու.
1) Պատրիարք Սրբազանը 11 Յունուար, 2023-ին Կալուածոց տեսչութեան պաշտօնէն հեռացուց նախկին Պարետ Ծ. Վարդապետ Երէցեանը,
2) 6 Մայիս, 2023-ին Երուսաղէմի Հայ Պատրիարքի նախագահութեամբ գումարուած Տնօրէն Ժողովը միաձայն որոշմամբ կարգալոյծ հռչակեց Պարետ Ծ. Վարդապետ Երէցեանը,
3) 10 Մայիս, 2023-ին անոր արտաքսեց Սրբոց Յակոբեանց մայրավանքէն.
Կարեւոր է շեշտել, որ Պատրիարք Սրբազանը այս որոշումներն առաւ եւ կամ գործադրեց այն բանէ ետք, երբ համոզուեցաւ, որ կարգ մը հարցերու մէջ Պարետ Ծ. Վարդապետ Երէցեան չարաչար օգտագործած է անոր վստահութիւնը եւ իրագործած է իր խաբեբայ եւ խարդախ գործընթացը։
Նկատի ունենալով վերոնշեալ բոլոր փաստերը, Միաբանական ժողովը միաձայն կը դիմէ Յորդանանի Հաշիմական Թագաւորութեանը եւ Պաղեստինեան կառավարութեանը կոչ ընելով վերանայիլ իրենց որոշումը եւ չեղեալ նկատել այն, որը մեծապէս պիտի նպաստէ Երուսաղէմի Հայ Պատրիարքին՝ առանց խոչընդոտի ապահովելու Պատրիարքութեան եւ հայ համայնքի շահերը»։
Դիւան Միաբանական
Ընդհանուր Ժողովոյ
