Այշէնուր Քոլիվար եւ Սիպիլ միասնաբար կ՚երգեն «Լուսի Հատիկ»ը
Պոլսահայ երաժշտական կեանքի մէջ խիստ շահեկան արդիւնք մըն է «Լուսի Հատիկ» երգը եւ այդ երգի զուգահեռ նկարահանուած տեսահոլովակը։ Երկու անուանի մենակատարներ Այշէնուր Քոլիվար եւ Սիպիլ մին համշէնահայերէնով, իսկ միւսը արեւմտահայերէնով մեներգած են Արի Հերկելի յօրինումին վրայ Մհեր Մահիր Էօզքանի եւ Աշոտ Բագրատունիի բառերով հիւսուած երգը։ Այս հրաշալի միասնութեան ետին կայ «Քալան» ընկերութեան ստորագրութիւնը։ Մնացեալը կը լսենք այս մասին կատարուած հաղորդագրութենէն։
Իսթանպուլահայ երգչուհի Սիպիլ, որ երաժշտասէրներուն ծանօթ է արեւելահայերէն ու արեւմտահայերէն երգերու իր գեղեցիկ կատարումներով, եւ Այշէնուր Քոլիվար, որ երկար տարիներէ ի վեր կ՚ուսումնասիրէ Սեւ ծովու արեւելեան շրջաններու երաժշտութիւնը, միասնաբար կատարեցին «Լուսի Հատիկ» երգը, որ արդէն իսկ հրապարակուած է թուային հարթակներու վրայ։
«Լուսի Հատիկ» երգի յօրինումը կը պատկանի Արի Հերկելի, որ կատարած է նաեւ գործիքաւորումը։ Երգի արեւմտահայերէն խօսքերու հեղինակն է լիբանանահայ բանաստեղծ Աշոտ Բագրատունի, իսկ համշէնի բարբառով խօսքերը գրառած է համշենցի գրագէտ Մահիր Էօզքան։
Երգի տեսահոլովակը պատրաստուած է Էօզքան Աքսուլարի ղեկավարութեամբ։ «Լուսի Հատիկ» երգը, որ արեւմտահայերէնով ու համշէներէնով մարդկութիւնը բարութեան կը հրաւիրէ, երաժշտասէրներու ներկայացուած է ստեղծագործութեան արտադրութիւնը ստանձնած «Քալան» երաժշտական ընկերութեան YouTube-ի ալիքին վրայ։ Երգը ունի անգլերէն , արեւելահայերէն եւ թրքերէն ենթագիր թարգմանութիւններ, ինչպէս նաեւ ձայնային նկարագրութիւն ու ժեսթերու լեզուով թարգմանութիւն։
Միաւորելով նոյն լեզուի երկու տարբեր արտայայտութիւնները, որոնք նոյն տարածքին ապրելով հանդերձ հեռու մնացած են իրարմէ, երգը ուշադրութիւն կը հրաւիրէ արեւմտահայերէնի ու համշէներէնի հարազատութեան վրայ, նաեւ կը յիշեցնէ որ այս երկուքն ալ կը գնահատուին որպէս անհետացման վտանգի տակ գտնուող լեզուներ։
Սիպիլ միջազգային ճանաչում կը վայելէ հայ ժողովրդական երաժշտութեան մարզէն ներս կատարած իր գործերով, իսկ Այշէնուր Քոլիվար իւրօրինակ կատարումներով կը մշակէ Սեւ ծովու արեւելեան շրջաններու բազմամշակոյթ արուեստը։ Անոնք միասնաբար յոյսի ձայնը կը փոխանցեն «Լուսի Հատիկ» երգին հետ, որ միաժամանակ գարնան զարթօնքը կը խառնէ Վարդավառի խանդավառութեան։
