Այստեղ ենք Աղբարիկ
ԼՈՒՍՅԷՆ ՔՈՓԱՐ
«Եթէ ոչ հատն ցորենոյ անկեալ յերկիր մեռանիցի, ինքն միայն կայ, ապա եթէ մեռանիցի, բազում արդիւնս առնէ»: (Եթէ ցորենի հատիկը հողի մէջ ընկնելով չմեռնի, ինք միայն կը մնայ, բայց եթէ մեռնի, բազում արդիւնք կու տայ):
Յովհաննու Աւետարան 12։24
Ցորենի հատիկ մըն է Հրանդ Տինք։ Բերրի հողին վրայ ինկած ցորենի հատիկ մը։ Խաղաղութիւն, սէր, եղբայրութիւն գովերգող այդ հատիկը հողին ինկաւ եւ մինչեւ օրս բազում արդիւնք կ՚առնէ։
Մարդ էր Հրանդի ինքնութիւնը։ Եւ սիրտը խիղճ։ Ինքնութիւն, որ բաց էր համայն աշխարհի մարդկութեան եւ սիրտ, որ վիրաւոր էր բոլորին տառապանքով։ Այսօր բիւրաւոր սիրտեր եկած են այդ մեծ սիրտը ողջունելու։
Յունուարի 24-ն է 2016 թիւ։ Օրերէն Կիրակի եւ բոլորս մէկտեղուած ենք Լիւթֆի Քըրտարի անուան ընդարձակ դահլիճի մէջ։ Բոլորին սրտերը նոյն կշռոյթով կը տրոփէր՝ «խաղաղութիւն բոլորին համար», «սէր բոլորին հանդէպ»։ Բեմին վրայ տասնեակներով մարդ կազմ եւ պատրաստ են քեզ պիտի փառաբանեն Պարոն։ Այս գիշեր Հրանդ Տինք Օրաթօրիայի Պոլսոյ մէջ առաջին ունկնդրութիւնն է որ կը կայանայ։ Մաժակ Թօշիկեանի յօրինումն է՝ բառերը Պերճուհի Պէրպէրեանին։ Երեք գեղաձայն մենակատարները քեզ կ՚երգեն իրենց ձայնի բոլոր քնքուշութեամբ։ Պերճուհի Պէրպէրեանի խօսքերը ճիշդ ալ քու միտքդ կը ցոլացնէ։ Քանի բեմը կը դիտեմ ալ աւելի կը ոգեւորուիմ հրճուանք կը պատէ հոգիս։ Լուսաւորիչ Երգչախումբ իր խմբավարով յիսունէ աւելի կ՚երեւին։ Անոնց հետ միասին նուագախումբի քառասունէն աւելի հաշուող կազմը։ 11 հատուածներէ կը բաղկանայ Մաժակ Թօշիկեանի Օրաթօրիօն։ Երեք գեղաձայն մենակատարներ բեմին վրայ։ Վերնաբամբ Պօղոս Եղիեազար, զիլ Գարին Չուպուքճեան Պօզքուրթ եւ բամբ Սէրճան Կազէրօղլու իրենց արուեստին նկատմաբ տածած յարգանքին համազօր յարգանք կը ցուցաբերեն քեզի նկատմամբ։ Բոլորս կը նշմարենք անոնց յարգանքը իրենց աչքերուն մէջ։ Պաս կիթարահար Արէտ Խրիմեան, հարուածային գործիքներով Արտա Ույար, դաշնակահարներ Արէտ Պոզթաշ եւ Ժուլիա Դաւիթ, թոնմայսդր Էօմէր Գարակիւզէլ նոյն հպարտութիւնը կը կիսէին։ Նազելի հանդիսավար Գարոլին Մամիկոնեան միասնաբար կը ձայնէին քեզ՝ «հոս ենք աղբարիկ»։
Քեզմով նշեցինք Մխիթարեան Սանուց Միութեան 70 ամեակը։ Քեզմով, քու ընտանիքով եւ մեզմով, մենք 1.700 հանդիսատեսերով։
