Ակադեմիա-Զ՝ երազի մը իրականացումը
ՎԱՐԴԱՆ ԷՍԴՈՒԳԵԱՆ
Կոմիտաս Վարդապետի Իսթանպուլի մէջ երաժշտանոց մը հիմնելու երազանքը անկատար մնաց իր կենդանութեան օրերուն։ Հազիւ Հանրապետական Թուրքիոյ տարիներուն է որ երաժշտական ուսում ջամբող հաստատութիւն մը հիմնուեցաւ Թուրքիոյ մէջ։ Հարիւր տարի անց Սայաթ Նովա Երգչախումբի խմբավար Մէլիքճան Զաման այս օրերուն կ՚ապրի հոգեկան այն ոգեւորութիւնը, որ երազած էր Մեծն Կոմիտաս։ Արդարեւ ան ձեռնարկած է Ակեդեմիա-Զ կոչումով երաժշտական ուսումնարանի մը հիմնադրութեան։ Այս մասին մտերիմ զրոյց մը ունեցանք մեր ընկերոջ հետ, որ պատմեց այս ոդիսականը սկսելով իր երաժշտական ուսումի առաջին քայլերէն։ «1989-ին, երբ եօթը տարեկան էի եղբայրս Սայաթ զիս ծանօթացուց իր ուսանած Միմար Սինան Երաժշտանոցի տնօրէնին հետ։ Տնօրէնը զիս ուղղեց իր ուսանողներէն Մէթին Պարութի։ Այսպէսով սկսաւ իմ ջութակի հետ փորձը։ Տունի պայմանները անշուշտ որ շատ օգնած էին դէպի երաժշտութիւն ուղղուելուս։ Մայրս եւ մօրեղբայրս բառին բուն իմաստով երաժշտասէրներ էին։ Եղբայրս Սայաթ երաժշտանոցի ուսանող, դաշնակահար եւ այս բոլորի մէջ իմ ճանապարհս ալ արդէն ճշդուած էր։ Հետեւաբար երաժշտանոցէ շրջանաւարտ ըլլալէ ետք մանկավարժական վկայական ստացայ նաեւ նոյն համալսարանէն եւ 2014-ին ալ Քիւլթիւր Համալսարանէն մասնագիտական կոչում ստացայ»։
Կենսագրական այս տեղեկութիւններէ ետք կ՚ուզենք լսել Պաքըրգիւղի մէջ երաժշտանոց մը բանալու որոշումին մանրամասնութիւնները։ «2005-ին սկսայ Պաքըրգիւղցի Արուեստագէտներու Միութեան մէջ դասաւանդելու։ Այդ միջոցաւ ծանօթացայ պաքըրգիւղաբնակ հասարակութեան նախասիրութիւններուն։ Առաջին անգամ հոն սկսաւ ինծի յատուկ «տուն» մը ունենալու երազանքը։ Այդ գաղափարը առեւտրական նպատակներէ դուրս էր։ Աւելի հարազատ միջավայր մը ստեղծել ուզած էի։ Թէեւ այս կարծիքը միշտ կար միտքիս մէջ սակայն ներկայ հաստատութեան տանող գործընթացը բոլորովին յանկարծակի երեւոյթ մըն է։ Եշիլգիւղի դպրոցէն ելած էինք եւ ընկերոջս հետ պատահաբար տեսանք վրան -Վարձու է- գրուած շէնքը։ Նոյն պահուն, նոյն բանը մտածեցինք։ Շնորհիւ Սայաթ Նովա Երգչախումբէն ծանօթ Կիւլիզար Արթուչի, գտանք այս շէնքը եւ վարձեցինք։ Այս մասին փորձառութիւն մը չունենալու հանդերձ, տասը օրուան կարճ ժամանակի մը մէջ լրացուցինք բոլոր թղթաբանութիւնները։ Ակադեմիա-Զ երաժշտական բաժնի մէջ ունի ջութակի, սրինգի, դաշնամուրի, թաւ ջութակի, քլարինէթի, սաքսաֆոնի, կիթարի եւ ձայնամարզութեան բաժիններ։ Կողքին ունինք 90 ուսանողներով գործող պալէի բաժինը։ Ակադեմիա-Զ կը յաճախեն թատրոնի, բեմական արուեստներու, փէրֆօրմանսի եւ յանկարծաբանութեան ուսանողներ»։
Այս անգամ կ՚ուզենք լսել դպրոցի շրջանաւարտներու ձեռքբերումներուն մասին։ Մէլիքճան Զաման ոգեւորութեամբ կը պատմէ. «ակադեմիան պաշտօնապէս ճանչցուած է Թուրքիոյ Կրթական Նախարարութեան կողմէ։ Կրնամ ըսել որ մեր հաստատութեան վկայականը ուսանողներուն առջեւ կարեւոր առիթներ կ՚ապահովէ։ Օրինակի համար այստեղ ուսում ստացողները կ՚ընդունուին Լոնտոնի Արքայական Ակադեմիա, կամ Լոնտոնի Երաժշտական լսարան։ Այս երկու դպրոցներուն ալ ութերորդ դասարանի վկայականները վաւերացուած են ամբողջ Եւրօ Միութեան տարածքին։ Ուսանողներ այս դպրոցներու ծրագիրներուն կը հետեւին իրենց քաղաքներուն մէջ։ Քննութիւններ կը յանձնեն Անգլիայէն եկած դատակազմի մը։ Շրջանաւարտները իրենց վկայականով կրնան ուսուցչագործել նաեւ նմանատիպ դասընթացքներու եւ կամ դպրոցներու երաժշտական ակումբներուն մէջ»։
Մէլիքճան Զաման կը նշէ որ իրենց հաստատութեան աւարտական քննութիւններն ալ կը կայանան Կրթական Նախարարութեան յատուկ հսկողութեան տակ։ «Վերջապէս մեր տուածը դասընթացքի մը մասնակցած ըլլալու փաստաթուղթէն աւելի Կրթական Նախարարութեան կողմէ ճանչցուած վկայական մըն է»։ Ի վերջոյ Զաման կ՚աւելցնէ թէ յատուկ կարողութիւն ունեցող ուսանողները եւ նիւթական անապահովութեան մէջ գտնուած աշակերտները կ՚օգտուին հաստատութեան կրթաթոշակներէն։ Այս բոլորին մասին աւելի լրացուցիչ տեղեկութիւններու համար կարելի է դիմել [email protected], www.akademi-z.com կայքէջներուն կամ (0212) 466 07 60 եւ (0549) 466 07 60 հեռախօսահամարներուն։
