Ապրիլեան գերմանահայ օրակարգ
Գերմանիոյ Հայոց Առաջնորդարանի հրապարակած հաղորդագրութիւնով կը տեղեկանանք հայոց մեծ եղեռնի 101-ամեակին առթիւ Գերմանիոյ մէջ կատարուած բազմաբնոյթ միջոցառումներուն, որոնց իր մասնակցութիւնը եւ հովանաւորութիւնը կը բերէր Գարեգին Արք. Պէքճեան։
Ժամանակագրական կարգով առաջին միջոցառումը կայացած է 17 Ապրիլ Կիրակի Ենա քաղաքին մէջ, ցեղասպանութեան զոհերու յիշատակին ձօնուած խաչքարի օծումով։ Փոլ Կիւլօղլուի բարերարութեամբ տեղադրուած խաչքարի օծման հանդէսին ներկայ գտնուեցան ՀՀ Գերմանիոյ դեսպան Աշոտ Սմբատեան, Ենայի քաղաքապետ Ալպրէրթ Շրէօթէր, եկեղեցական, քաղաքական, ընկերային հաստատութիւններու ներկայացուցիչներ եւ բազմաթիւ հիւրեր։
Առաջնորդ Սրբազանը 23 եւ 24 Ապրիլ թուականներուն ալ մասնակցեցաւ մայրաքաղաք Պեռլինի մէջ կազմակերպուած յիշատակման միջոցառումներուն։ Անոնցմէ առաջինը Ապրիլ 23-ին տեղի ունեցաւ Պեռլինի Կաթողիկէ Եկեղեցւոյ շրջափակին մէջ, ուր տեղադրուած էր եւս խաչքար մը։ Եկեղեցին ունի պատմական նշանակութիւն, քանի որ 14 Մայիս 1919-ին Գերմանիոյ տարածքին մէջ առաջին անգամ այս տեղ կայացած է ցեղասպանութեան զոհերու առաջին յիշատակումը։ Իսկ Ապրիլ 24-ի առաւօտուան ժամերուն Պեռլինի Պրանտենպուրկեան դարպասներուն մօտ գերմանահայ երիտասարդներու կողմէ կազմակերպուած միջոցառումը կը կռէր «100 եւ Մէկ Տարուայ Լռութիւն» խորագիրը ու կը հովանաւորուէր Գերմանահայ Կեդրոնական Խորհուրդի կողմէ։
Կիրակի օրուայ յիշատակման վայրերէն մէկն էր «Լուիզընհօֆ» գերեզմանը, ուր զետեղուած է Օսմանեան Կայսրութեան երեք ժողովուրդներու՝ հայերու, ասորիներու եւ պոնտացի յոյներու զոհերուն ձօնուած յուշարձան մը։ Օրը շարունակուեցաւ ՀՀ Գերմանիոյ Դեսպանութեան, Գերմանիոյ Հայոց Առաջնորդարանի, Գերմանահայոց Կեդրոնական Խորհուրդի կողմէ կազմակերպուած յուշատօնով։
Նոյն օր Միւնխէնի եւ ՔԷօլնի հայ համայնքներն ալ մէկտեղուած էին ցեղասպանութեան զոհերը յիշատակելու համար Սուրբ Սահակ-Մեսրոպ Առաջնորդարանի Եկեղեցին։
Կ՚առժէ նշել որ բոլոր միջոցառումներուն իրենց մասնակցութիւնը կը բերէին շրջանային վարչութիւններու ներկայացուցիչները, զանազան յարանուանութիւններէն հոգեւորականներ, գերմանացի եւ թուրքիացի ակադեմականներ, քաղաքական գործիչներ եւ մտաւորականներ։
